अवैध रूपमा लुकाएर राखिएको ४० क्यूफिट सालको काठ बरामद

सुर्खेत : सुर्खेतको बराहताल गाउँपालिकामा अवैध रूपमा लुकाएर राखिएको सालको काठ बरामद गरिएको छ। बुधबार दिउँसो बराहताल गाउँपालिका–८ धुलेचौरस्थित ४३ वर्षीय भुपेन्द्र बहादुर थापाको घरबाट ४२ थान (टुक्रासहित) करिब ३९.८३ क्यूफिट सालको चिरान काठ बरामद गरेको हो।

स्रोतका अनुसार विशेष सूचनाको आधारमा खटिएको इलाका प्रहरी कार्यालय बाबियाचौर र डिभिजन वन कार्यालय भेरीको संयुक्त टोलीले उक्त काठ बरामद गरेको हो। यता, डिभिजन वन कार्यालय सुर्खेतले उक्त घटनाबारे जानकारी नभएको बताएको छ।

कार्यालयले यस विषयमा सबै विवरण डिभिजन वन कार्यालय भेरीसँग रहेको भन्दै थप टिप्पणी गर्न अस्वीकार गरेको छ। विषेस स्रोतका अनुसार थापा रास्वपा सुर्खेत सह(सचिव तथा संगठन बिभाग प्रमुख समेत रहेका छन्। उनी लामो समयदेखि ठेक्कापट्टाको काममा संलग्न रहेको समेत पाईएको छ ।