आइसीसी टी–२० विश्वकप : नेपालकाे लगातार तेस्रो हार

काठमाण्डौँ । आइसीसी टी–२० विश्वकप २०२६ मा लगातार तेस्रो खेलमा हार बेहोर्दै नेपालको विश्वकप पुनः समुह चरणमा नै सीमित भएको छ । नेपाल वेस्ट इन्डिजसँग ९ विकेटले पराजित भएको हो । नेपाललाई पराजित गरेसँगै वेस्ट इन्डिज भने सुपर ८ मा प्रवेश गरेको छ ।

मुम्बईको वानखेडे क्रिकेट स्टेडियममा टस हारेर ब्याटिङको निम्तो पाएको नेपालले निर्धारित २० ओभरमा ८ विकेट गुमाउँदै १३३ रन बनाएको थियो । नेपालले दिएको १३४ को विजयी लक्ष्य पछ्याएको वेस्ट इन्डिजले १५.२ ओभरमा १ विकेट गुमाउँदै लक्ष्य पूरा गरेको हो ।

वेस्ट इन्डिजका लागि कप्तान साई होपले ६१ रनको अर्धशतकीय पराी खेले । उनले ४४ बलमा ५ चौका र ३ छक्का प्रहार गरे। सिम्रोन हेटमायर ४६ रनमा अविजित रहे। यी दुईले दोस्रो विकेटको लागि ९१ रनको साझेदारी गर्दै जित सुनिश्चित गरेका हुन्। वेस्टइन्डिजका लागि पहिलो र एक मात्र विकेटको रुपमा ओपनर ब्रान्डन किंगको विकेट गयो । उनले १७ बलमा ४ चौकासहित २२ रन बनाए । नेपालका लागि एक मात्र विकेट नन्दन यादवले लिए ।

त्यसअघि, पहिलो इनिङ्समा ब्याटिङ गरेको नेपालको लागि दिपेन्द्र सिंह ऐरीले सर्वाधिक ५८ रन बनाए। उनले ४७ बलमा ३ चौका र ३ छक्का प्रहार गरे । सातौं विकेटको लागि उनले सोमपाल कामीसँग ५४ रनको साझेदारी गरेका थिए । नेपालले पहिलो विकेटको रुपमा ओपनर कुशल भुर्तेल १ रनमा पहिलो ओभरमै अकेल होसेनको बलमा बोल्ड भए ।

दोस्रो विकेटको रुपमा कप्तान रोहित कुमार पौडेल म्याथ्यू फोर्डेको बलमा एलबीडब्ल्यू भए । उनी ५ रनमै पेभेलियन फर्किए । चौथो ओभरमा रोहितको विकेटसहित फोर्डेले विकेट मेडन ओभर फाले । तेस्रो विकेट ओपनर आसिफ शेख क्याच भए। आसिफले भने २ चौकासहति १० बलमा ११ रन बनाएका थिए ।

पावरप्लेमा ३ विकेट गुमाउँदै २२ रन बनाएको थियो । १० ओभरमा ४ ओभरको क्षतीमा ४२ रन बनाएको थियो । ११.२ ओभरमा दिपेन्द्र सिंह ऐरीले गुडकेश मोतीलाई छक्का प्रहार गर्दै नेपालको ५० रन पूरा गरेका थिए । पाँचौं विकेट लोकेश बमको गयो । उनले १३ रन बनाएर विकेटकिपरको हातमा क्याच भए । त्यसपछि गुल्सन झा र दिपेन्द्र सिंह ऐरीले छैटौं विकेटको लागि २७ रनको सानो साझेदारी बनाए ।

१७.४ ओभरमा ६ विकेटको क्षतीमा १०० रन पूरा गरेका हुन्। १८ औं ओभरमा सोमपाल कामीले ३ वटा लगातार चौकासहित १६ रन बनाए । सातौं विकेटको रुपमा दिपेन्द्र सिंह ऐरी क्याच भए । सोमपाल कामी २६ रनमा अविजित रहे। आठौं विकेटको रुपमा करण केसी अन्तिम बलमा क्याच भए । वेस्ट इन्डिजका लागि बलिङ तर्फ ज्यासन होल्डरले सर्वाधिक ४ विकेट लिए। अकेल होसेन, म्याथ्यू फोर्डे, शमर जोसेफ र रोस्टन चेजले १–१ विकेट लिए ।