काठमाडौँ : कक्षा १२ को वार्षिक परीक्षा आज सोमबारदेखि देशभर सुरु भएको छ। राष्ट्रिय परीक्षा बोर्ड का अनुसार यस वर्ष कुल ४ लाख १८ हजार ८ जना विद्यार्थी परीक्षामा सहभागी हुँदैछन्। परीक्षा वैशाख २७ गतेसम्म सञ्चालन हुनेछ र सकिएको करिब ४५ दिनभित्र नतिजा सार्वजनिक गर्ने तयारी गरिएको छ।
बोर्डले दिएको विवरणअनुसार नियमिततर्फ ३ लाख ३२ हजार १७८ विद्यार्थी छन्, जसमा १ लाख ७२ हजार १२ छात्र, १ लाख ६० हजार १३७ छात्रा र २९ जना अन्य समूहका परीक्षार्थी छन्। आंशिकतर्फ भने ८५ हजार ८३० विद्यार्थी सहभागी छन्, जसमा २०७९ यताका विद्यार्थीहरू समावेश छन्। विदेशस्थित एभरेस्ट स्कुल जापान बाट समेत ३९ जना विद्यार्थीले परीक्षा दिँदै छन्। जिल्लागत रूपमा काठमाडौं जिल्ला मा सबैभन्दा बढी ६४ हजार ३३८ विद्यार्थी छन् भने मनाङ जिल्ला मा सबैभन्दा कम ३१ जना परीक्षार्थी छन्।
गत वर्षको तुलनामा परीक्षार्थी संख्या घटेकाले परीक्षा केन्द्र पनि कम गरिएको छ। यस वर्ष १ हजार ४२१ केन्द्र तोकिएका छन्, जबकि अघिल्लो वर्ष ५ लाखभन्दा बढी विद्यार्थीका लागि १ हजार ५९१ केन्द्र निर्धारण गरिएको थियो। अघिल्लो वर्ष ६१.१७ प्रतिशत विद्यार्थी उच्च शिक्षाका लागि योग्य घोषित भएका थिए।
परीक्षा सञ्चालनका लागि केन्द्राध्यक्ष, निरीक्षक, कर्मचारी र सुरक्षाकर्मी गरी ४४ हजारभन्दा बढी जनशक्ति परिचालन गरिएको छ। उत्तरपुस्तिका र अन्य सामग्री केन्द्रहरूमा पठाइसकिएको छ भने प्रश्नपत्र भने कोभिडकालदेखि लागू गरिएको प्रणालीअनुसार अनलाइनमार्फत केन्द्रमै डाउनलोड र प्रिन्ट गरेर वितरण गरिनेछ।
सरकारको निर्देशनअनुसार यसपटक नतिजा छिटो सार्वजनिक गर्ने तयारी गरिएको छ। जंगबहादुर अर्याल ले उत्तरपुस्तिका परीक्षण केन्द्र थपेर प्रक्रिया तीव्र बनाइने बताए। यसअघि नतिजा प्रकाशनमा करिब ९० दिन लाग्ने गरेको थियो।
परीक्षामा कडाइसमेत गरिएको छ। विद्यार्थीहरूलाई परीक्षा सुरु हुनुभन्दा आधा घण्टा अगाडि केन्द्रमा पुग्नुपर्नेछ र १५ मिनेट ढिलो आएमा प्रवेश नदिइनेछ। मोबाइल फोन, स्मार्ट घडीजस्ता इलेक्ट्रोनिक उपकरण पूर्ण रूपमा निषेध गरिएको छ। प्रयोग गरेको पाइएमा सम्पूर्ण परीक्षा रद्द गरिने चेतावनी बोर्डले दिएको छ।
परीक्षा व्यवस्थित बनाउन प्रत्येक जिल्लामा प्रमुख जिल्ला अधिकारीको संयोजकत्वमा अनुगमन समिति गठन गरिएको छ। अनुपस्थित हुने विद्यार्थीका लागि पुनः परीक्षा दिने व्यवस्था भने राखिएको छैन।
प्रतिक्रिया दिनुहोस्