ग्लोबल आइएमई बैंकमा किओस्क मेसिनबाटै बैंक खाता खोल्न सकिने

काठमाडौं । ग्लोबल आइएमई बैंक लिमिटेडले ग्राहक स्वयंले बैंक खाता खोल्न सक्ने सुविधा सार्वजनिक गरेको छ । बैंकले सरल, सहज र अत्याधुनिक बैंकिङ प्रदान गर्ने उद्देश्यले बैंकको शाखा कार्यालयमा रहेको किओस्क मेसिनबाट खाता खोल्न सकिने सुविधा सार्वजनिक गरेको हो ।

बैंकले आफ्नो १९औं वार्षिककोत्सवको अवसर पारेर यो सुविधा ल्याएको हो ।

ग्राहकले बैंकको काठमाडौंको कमलादीस्थित शाखा कार्यालयमा रहेको किओस्क मेसिनबाटै सहजै बैंक खाता खोल्न सक्नेछन् ।

यसरी खाता खोल्ने क्रममा सम्पूर्ण विवरण किओस्क मेसिन मार्फ्त प्रदान गर्नुपर्नेछ । तत्पश्चात्, आवश्यक कागजात प्रविष्ट गरी खाता नम्बर उपलब्ध गराइनेछ । हालका लागि यो सेवा बैंकको कमलादीमा रहेको डिजिटल युनिभर्सबाट मात्र उपलब्ध हुने बैंकले जनाएको छ ।

यसअघि, बैंकले बैंकको कमलादीस्थित शाखामा रहेको डिजिटल युनिभर्स मार्फत मेसिनबाटै क्यास डिपोजिट र चेक डिपोजिटजस्ता सेवा उपलब्ध गराइरहेको थियो ।

भविष्यमा यस्ता सेवालाई बैंकले अरू स्थानमा पनि विस्तार गर्दै जाने योजना राखेको छ ।