प्रधानमन्त्री र मन्त्रीहरुको एक महिनाको पारिश्रमिक कोषमा जम्मा गर्ने निर्णय

काठमाण्डौँ । प्राकृतिक विपद्बाट प्रभावितको उद्धार तथा राहतका लागि सरकारले प्रधानमन्त्रीसहित सबै मन्त्रीहरूको एक महिनाको तलब प्रधानमन्त्री दैवी प्रकोप उद्धार कोषमा जम्मा गर्ने निर्णय गरेको छ।

प्रधानमन्त्री तथा मन्त्रिपरिषद् कार्यालयमा शुक्रबार बसेको मन्त्रिपरिषद् बैठकले प्रधानमन्त्री र मन्त्रीहरूकाे एक महिनाको तलब दैवी प्रकोप कोषमा जम्मा गर्ने निर्णय गरेकाे हाे ।
यस्तै बैठकले गएको बुधवार नेपाल–चीन सीमा रसुवागढी एवम् भोटेकोशी नदी तथा तल्लो तटीय क्षेत्रमा आएको बाढीबाट प्रभावित जिल्लामा क्षति पुगेका व्यक्ति, व्यावसायिक संस्थाका लागि सहुलित तथा पुनर्स्थापना प्याकेज तयार गर्न अर्थ मन्त्रालयलाई निर्देशन दिने निर्णय गरेको छ ।
बैठकले भारतसँग जीटुजी खरिद माध्यमबाट २५ हजार मेट्रिक टन डीएपी मल खरिद गर्न कृषि सामग्री कम्पनी लिमिटेडलाई सैद्धान्तिक स्वीकृति प्रदान गर्नेसमेत निर्णय गरेको छ ।