सुर्खेतमा जेसिबी दुर्घटना हुँदा चालकको मृत्यु

सुर्खेतको बराहताल गाउँपालिकामा सडक निर्माणका क्रममा जेसिबी दुर्घटना हुँदा एक जनाको मृत्यु भएको छ। बराहताल गाउँपालिका–७ नयाँवनस्थित भित्री सडक खण्डमा बाटो सफा गर्ने क्रममा भे १ ग १२७ नम्बरको जेसिबी सडकबाट करिब ३०० मिटर तल खसेर दुर्घटना भएको हो।दुर्घटनामा परी जेसिबी चालक बराहताल गाउँपालिका–५ बस्ने ३३ वर्षीय रामप्रसाद लामिछानेको मृत्यु भएको प्रहरीले जनाएको छ। बिहीबार दिउँसो करिब १:२० बजे दुर्घटना भएको खबर पाएलगत्तै प्रहरी चौकी बड्डिचौरबाट प्रहरी टोली घटनास्थलतर्फ खटिएको थियो।दुर्घटनामा गम्भीर घाइते भएका लामिछानेलाई टाउको र शरीरका विभिन्न भागमा चोट लागेको अवस्थामा तत्काल उद्धार गरी कर्णाली प्रदेश अस्पताल कालागाउँ पठाइएको थियो। अस्पताल पुर्‍याएर ईसीजी  गर्दा चिकित्सकले उनलाई मृत घोषणा गरेका हुन्।